Tiniyak ng Malacañang na magkakaroon ng masusing pagsubaybay ang pambansang pamahalaan sa paggastos at paggamit ng Local Government Support Fund (LGSF) upang mapigilan ang anumang anyo ng pang-aabuso sa pondo ng bayan.
Ayon kay Palace Press Officer Undersecretary Claire Castro, hindi nagwawakas sa pamamahagi ng pondo ang responsibilidad ng pambansang gobyerno sa mga local government unit (LGU).
Nakalaan ang pondong ito para sa iba’t ibang proyektong pampubliko tulad ng imprastraktura, farm-to-market roads , water systems , mga pasilidad sa kalusugan, disaster resiliency , at tulong sa mga mahihirap na sektor.
Pumalo sa P57.8 bilyon ang pondong inilaan para sa LGSF ngayong taon, habang inirerekomenda itong itaas sa P58.53 bilyon sa darating na 2027.
**
Naniniwala ang political science professor na si Prof. Antonio Contreras na makailang-ulit nang lumabag si Senator Robin Padilla sa mga panuntunan ng Senate Impeachment Court, partikular sa Rule 18 o ang sub judice rule.
Ayon kay Contreras, naging madalas ang paglabag ng senador sa nakalipas na mga araw ng pag-usad ng impeachment trial.
Inihalimbawa ng propesor ang ginawa ni Padilla noong Agosto 27 kung saan itinuring niyang labis na out of line ang linya ng pagtatanong nito ukol sa paggamit ng alyas ng mga bayani kumpara sa paggamit ng alyas ng mga tumanggap ng confidential funds, dalawang bagay na hindi umano pwedeng ikumpara sa tamang konteksto.
Idinagdag pa ng dalubhasa na nagmumukhang theater of the absurd ang interpellation ng senador at hindi na matukoy kung nais ba nitong magpatawa o maging romantiko sa gitna ng seryosong paglilitis.
**
Nagmamadali na ngayon ang defense team ni Vice President Sara Duterte na makahanap ng bagong tagapagsalita kasunod ng ipinatupad na mas mahigpit na alituntunin sa sub judice rule ng Senate Impeachment Court.
Ayon kay Michael Poa, na kasalukuyang tumatayong abogador at tagapagsalita ng depensa, may malaking sense of urgency na mapalitan siya sa posisyon bilang spokesperson upang maiwasang malagay sa panganib ang kanilang kampo kung sakaling makapagsalita siya ukol sa mga paksang bawal pang talakayin sa labas ng paglilitis.
Paliwanag ni Poa, mahirap balansehin at tukuyin kung aling mga usapin sa impeachment trial ang pwedeng ilabas sa media, lalo’t siya rin ang mismong humaharap sa impeachment court bilang abogado.
Dahil dito, makikipag-usap siya muli kay VP Duterte upang pormal nang magtalaga ng hiwalay na tagapagsalita upang makatutok na lamang siya sa legal na proseso bilang counsel.