Muling naungkat ang umano’y pangako ng Pilipinas na tatanggalin nito ang BRP Sierra Madre na nakasadsad sa Ayungin Shoal sa West Philippine Sea.
Ito ay matapos sabihin ni Chinese embassy deputy spokesperson Guo Wei na nangako umano ang Pilipinas na alisin ang barko sa lugar.
Subalit tinutulan ito ng Armed Forces of the Philippines (AFP) at nanindigang hindi aabandonahin ang barko. Ayon kay AFP spokesperson for the West Philippine Sea retired Rear Admiral Roy Vincent Trinidad, ang kamakailang pahayag ng Chinese embassy ay pagtatangkang baguhin ang kasaysayan kaugnay ng presensiya ng BRP Sierra Madre sa Ayungin Shoal.
Aniya, ang Chinese Communist Party (CCP) ang unang iligal na nag-okupa noong 1995 sa Panganiban Reef (Mischief Reef), na nasa loob ng exclusive economic zone (EEZ) ng Pilipinas.
Saad pa ni Trinidad na nasa “rekord” na tiniyak ng Chinese Foreign Ministry sa Pilipinas at sa international community na ang maliit at octagonal wooden structures na itinatag sa Panganiban Reef ay pawang “shelters” o silungan lamang para sa mga lokal na mangingisda at nangako ang China na ang mga pansamantalang istruktura na ito ay walang military purpose.
**
Nilinaw ng US Embassy sa Pilipinas ang presensiya ng American at Filipino military personnel sa isinagawang raid sa Sanjia Steel Corporation facility sa Tagoloan, Misasmis Oriental na nagresulta sa pag-aresto sa 69 na Chinese nationals at isang Pilipino noong Mayo 15.
Sa isang pahayag, ipinaliwanag ng embahada na ang site visit ay parte ng “routine planning efforts.”
Saad pa ng US embassy na ang team, na binubuo ng US military at personnel ng Armed Forces of the Philippines, ay dumating sa steel facility sa pakikipag-ugnayan sa PHIVIDEC Industrial Authority para suriin kung magagamit ang lugar para sa nalalapit na 2027 Balikatan military exercises.
Nang ipaalam umano ang access requirements sa pasilidad, nagtungo ang grupo sa ibang site gaya ng plano, at nilinaw na hindi nila pinilit na pasukin ito.
Sa halip, ginamit nila ang pagkakataong ito para pagtibayin ang kanilang hindi natitinag na commitment sa matatag na alyansa sa pagitan ng Amerika at Pilipinas.