Tinamaan ng serye ng airstrikes ang Kharg Island sa Persian Gulf, ilang oras bago ang itinakdang deadline ni U.S. President Donald Trump para sa Iran na muling buksan ang Strait of Hormuz.
Ayon sa ulat ng Iranian media, malalakas na pagsabog ang narinig sa isla na pangunahing terminal ng langis ng bansa, kung saan dumadaan ang halos lahat ng oil exports ng Iran.
Inilarawan dito ang mga pag-atake bilang coordinated strikes mula sa tinawag nilang “American-Zionist enemy.”
Makapal na usok ang nakita mula sa isla, na matagal nang itinuturing na “crown jewel” ng oil infrastructure ng Iran.
Kasabay nito, iniulat ng Israeli military na nakumpleto nila ang malawakang operasyon laban sa iba’t ibang “infrastructure sites” sa Iran.
Kabilang sa mga tinamaan ang isang tulay malapit sa Qom at isang railway bridge sa Kashan, kung saan dalawa ang nasawi at tatlo ang sugatan.
Matatandaang noong Marso, sinabi ni Trump na “totally obliterated” na ng U.S. forces ang mga military targets sa Kharg Island, ngunit pinili niyang huwag muna sirain ang oil facilities.
Ang bagong pag-atake ay nakikitang malaking escalation na posibleng magdulot ng pagkagambala sa pandaigdigang suplay ng langis at magpalala sa kasalukuyang krisis sa Middle East.
---
Nakipag-usap si U.S. President Donald Trump sa mga astronaut ng Artemis II mission matapos ang kanilang matagumpay na moon flyby nitong Abril 6, 2026.
Pinuri ng Pangulo ang apat na crew bilang mga “modern-day pioneers” at binigyang-diin na ang kanilang misyon ay nagbigay ng karangalan hindi lamang sa Amerika kundi sa buong mundo.
Sa kanilang paglalakbay, naitala ng Artemis II crew ang pinakamalayong distansya na narating ng tao mula sa Earth – 252,756 miles, mas mataas ng higit 4,000 miles kumpara sa rekord ng Apollo 13.
Tatlong Amerikano at isang Canadian ang bumubuo sa crew, na nagsilbing simbolo ng internasyonal na kooperasyon sa larangan ng space exploration.
Sa kanyang pakikipag-usap, tinanong ni Trump ang mga astronaut tungkol sa kanilang karanasan sa far side ng Moon, kabilang ang sandaling pagkawala ng komunikasyon sa Earth.
Binigyang-diin niya na ang kanilang tagumpay ay inspirasyon para sa susunod na henerasyon at patunay ng kakayahan ng tao na magtagumpay sa mga hamon ng siyensya at teknolohiya.
Ang Artemis II mission ay bahagi ng mas malawak na programa ng NASA na layong maghanda para sa muling paglapag ng tao sa buwan sa pamamagitan ng Artemis III, at kalaunan ay maglatag ng pundasyon para sa mga misyon patungong Mars.