Naglabas ang Bureau of Internal Revenue (BIR) ng Revenue Memorandum Circular (RMC) No. 024-2026 na naglilinaw na ang kita mula sa cross-border services ay hindi awtomatikong sakop ng Philippine income tax.
Layunin ng circular na magbigay ng mas malinaw na guidelines kung paano dapat tasahin ang mga transaksyong ito para sa income tax purposes.
Ang RMC ay nakabatay sa desisyon ng Supreme Court (SC) sa kasong Aces Philippines Cellular Satellite Corporation v. Commissioner of Internal Revenue, matapos lumabas ang pangamba na ang dating mga panuntunan ay naia-apply nang lampas sa kanilang saklaw.
Ayon sa BIR, bilang pangkalahatang tuntunin, ang kita mula sa serbisyo ay tinatax kung saan isinagawa ang serbisyo.
Bagama’t pinapayagan ng SC ruling na isaalang-alang kung saan nararanasan ang benepisyo ng serbisyo o kung saan nagaganap ang economic activity, binigyang-diin ng BIR na ang taxability ay dapat pa ring nakabatay sa partikular na facts ng bawat kaso.
Inaatasan ng circular ang mga revenue officers na suriin ang buong service agreements at iwasang gawing batayan ang isang aktibidad lamang para sa taxation.
Kinakailangan ding malinaw na mailahad ang legal at factual basis ng anumang tax assessment, alinsunod sa Section 228 of the Tax Code.
Para sa compliance, binanggit ng BIR ang mga dokumentong maaaring ipakita ng taxpayers sa audit, gaya ng service contracts, proof of foreign performance, at tax residency certificates.
Nilinaw din ng circular na hindi kailangan ng prior BIR ruling upang makuha ang tamang tax treatment ng cross-border transactions, basta’t may sapat na ebidensya ang taxpayers sa assessment.
Ayon kay BIR Commissioner Charlito Martin R. Mendoza, layunin ng circular na tiyakin ang mas consistent at patas na aplikasyon ng tax rules.
----
Nananatiling naka-antabay ang buong pwersa ng Philippine Coast Guard (PCG) sa lahat ng mga pangunahing pantalan sa bansa upang tiyakin ang kaligtasan at kaayusan para sa mga pasaherong humahabol sa pag-uwi matapos ang mahabang bakasyon ng Semana Santa.
Bagama’t pormal nang nagtapos ang Holy Week, tuloy-tuloy pa rin ang mahigpit na pagbabantay ng mga awtoridad ngayong araw.
Ayon sa PCG, inaasahan pa rin nila ang dagsa ng mga biyaherong pabalik na sa kanilang mga trabaho at tahanan mula sa mga lalawigan para sa post-holiday rush.
Base sa pinakahuling datos na inilabas ng kawanihan, pumalo sa 408,000 na inbound at outbound passengers ang naitala sa iba’t ibang pantalan sa buong Pilipinas kahapon, na kasabay ng pagdiriwang ng Easter Sunday.
Bilang bahagi ng paghahanda sa malaking bulto ng mga manlalakbay, una nang isinailalim sa heightened alert ang lahat ng districts, stations, at sub-stations ng PCG sa buong bansa.
Patuloy ang pakikipag-ugnayan ng kawanihan sa iba’t ibang ahensya upang masiguro ang maayos na daloy ng trapiko sa mga terminal at ligtas na paglalayag ng mga barko.