Inanunsyo ni U.S. President Donald Trump na kanya nang pinalawig ang ceasefire sa Iran matapos makiusap ang Pakistan, habang hinihintay pa ang isang “unified proposal” mula sa Tehran.
Ayon kay Trump, mananatiling naka-extend ang tigil-putukan hanggang sa makapagpasa ang Iran ng kanilang proposal at matapos ang negosasyon sa anumang paraan.
“He’s directed our Military to continue the Blockade and, in all other respects, remain ready and able, and will therefore extend the Ceasefire until such time as their proposal is submitted, and discussions are concluded, one way or the other,” pahayag ni Trump.
Sa gitna nito, nananatiling walang katiyakan ang usapin ng pangkapayapaan habang papalapit ang pagtatapos ng dalawang linggong ceasefire.
Nag-aalinlangan pa kasi ang Iran kung lalahok ito sa panibagong pag-uusap, at binanggit ang umano’y “unacceptable actions” ng Amerika, kabilang ang nagpapatuloy na blockade sa Strait of Hormuz.
Kinansela rin umano ni U.S. Vice President JD Vance ang nakatakdang pagbisita sa Pakistan para sa ikalawang yugto ng negosasyon, habang ang ibang opisyal ng U.S. ay nasa konsultasyon pa kung paano pag-uusapan ang peace talk.
Samantala, patuloy ang pagsisikap ng mga opisyal ng Pakistan na mapagkasundo ang dalawang panig upang maiwasan ang muling pagputok ng digmaan.
Sa ngayon, nananatiling bukas ang posibilidad ng panibagong negosasyon o muling paglala ng tensyon, habang hinihintay ang desisyon ng Iran at Estados Unidos.
---
Ikinadismaya ni Ukrainian President Volodymyr Zelensky ang sunod-sunod na pagbisita ng mga envoy ng Estados Unidos sa Moscow nang hindi man lamang dumadaan sa Kyiv, na aniya’y isang “disrespectful” sa gitna ng nagpapatuloy na digmaan sa Ukraine.
Sa isang panayam, sinabi ni Zelensky na bagama’t nauunawaan niya ang mga logistical challenges, hindi maikakaila na ang pagpunta nina Steve Witkoff at Jared Kushner sa Russia nang hindi binibisita ang Ukraine ay nagpapakita umano ng kakulangan sa paggalang.
“It’s disrespectful to come to Moscow and not Kyiv,” ani Zelensky, habang binibigyang-diin na bukas ang Ukraine sa pakikipagpulong kahit sa ibang bansa kung kinakailangan.
Si Witkoff, na special envoy ni U.S. President Donald Trump, ay ilang beses nang nakipagpulong kay Russian President Vladimir Putin sa Moscow.
Napag-alaman na kahit kailan ay hindi pa bumibisita ang mga opisyal sa Kyiv.
Nauna nang sinabi ni Zelensky na may planong bumisita sa Ukraine ang dalawang opisyal nitong Abril, ngunit hindi ito natuloy dahil sa paglipat ng atensyon ng Amerika sa tumitinding tensyon sa Gitnang Silangan, partikular sa sigalot ng U.S.-Israel laban sa Iran.
Sa kabila nito, iginiit ni Zelensky ang kahalagahan ng patuloy na kooperasyon sa Estados Unidos.
Sa kabilang dako nagpapatuloy ang mga usapin sa ceasefire sa Ukraine, na tumagal na ng mahigit apat na taon. Bagama’t may ilang napagkasunduan ukol sa military arrangements, nananatiling hindi na-resolba ang mahalagang isyu tulad ng status ng Donbas region at iba pang kondisyon na hindi matanggap ng magkabilang panig.
Sa kasalukuyan, nananatiling deadlock ang negosasyon, habang patuloy ang panawagan ng Ukraine para sa mas aktibong partisipasyon at pagkilala sa kanilang posisyon sa usaping pangkapayapaan.