Bukas ang Pilipinas sa pakikipagtulungan sa iba’t ibang bansa para sa oil at gas exploration at hindi lamang nakatuon sa isang bansa gaya ng China.
Ayon kay Energy Secretary Sharon Garin, kamakailan lamang ay nilagdaan ni Pangulong Ferdinand Marcos Jr. ang walong bagong service contracts para sa eksplorasyon ng langis, natural gas, at hydrogen kasunod ng pagpapalawig sa operasyon ng Malampaya.
Ipinaliwanag ng kalihim na bagaman may mga pribadong kumpanyang may mga partner na dayuhan mula sa Australia, United Kingdom, Israel, at Estados Unidos ay wala pang konkretong kontrata para sa joint exploration sa pagitan ng gobyerno ng Pilipinas at China.
Binigyang-diin ni Garin, batay sa huling pakikipag-ugnayan niya sa Embahada ng China ay nakatuon lamang ang pag-uusap sa pagtiyak na tuloy-tuloy ang dating ng mga order na diesel at petrolyo ng mga lokal na kumpanya at hindi tungkol sa eksplorasyon.
Sinabi ni Garin na bagaman may kakayahan ang mga Pilipino na mamuno sa mga drilling activities gaya ng sa Malampaya ay kailangan pa rin ang pakikipagtulungan sa mga dayuhang eksperto para sa mga makabagong teknolohiya.
Halimbawa nito ang eksplorasyon ng natural hydrogen sa Zambales, Palawan, at Nueva Ecija kung saan isang kumpanya mula sa Amerika ang katuwang ng bansa dahil sa kanilang expertise.
Tiniyak din ng opisyal na magiging malinaw at dadaan sa tamang proseso ang anumang proposal para sa mga joint exploration projects sa hinaharap.
---
Matapos agarang ipasa sa kongreso at senado ang batas na magsusupinde ng excise tax sa langis upang tugunan ang pagtaas ng presyo ng produktong petrolyo. Muling kinuwestyon sa pagdinig sa senado ang matagal na pagpapatupad nito.
Sa pagdinig ng Senate Committee on Agriculture, Binigyang-diin ni Senator Bam Aquino na dalawang linggo na dapat umano itong naipatupad simula nang maipasa nang sa gayo’y napababa na ang presyo ng langis sa bansa.
Muli rin binuksan ni Aquino ang panukalang pagsusupinde sa Value-added Tax (VAT) sa langis upang mas lalong mabawasan ang pasanin ng mamamayang Pilipino sa mahal na petrolyo. Aniya, malinaw umano na sa pagdinig ng Senate Ad Hoc Protect Committee, mismong mga oil companies na ang nagsabi na kaya nilang ipatupad ang suspensyon sa buwis sa langis at agad nitong mapapababa ang presyo sa merkado.
Dagdag pa ng senador, dapat din aniyang pagtuonan ng pansin ng pamahalaan ang pagpapanatiling bukas ang mga paraalan para edukasyon ng mga kabataan at masiguradong may maayos parin na serbisyo sa mga ospital sa gitna ng mataas na presyo ng produktong petrolyo.
Inihalimbawa din ni Aquino ang mga naging aksyon ng pamahalaan ng ilang bansa na parehong apektado din sa nagaganap na digmaan sa Middle East na maaring ipatupad din ng ating gobyerno.
Kabilang sa mga ito ang aniya’y libreng public transportation sa Australia, linggohang cash assistance sa New Zealand at sa Ethiopia kung saan lahat ng mamamayan ay nakakatanggap ng subsidiya at hindi lang ang kanilang sektor sa transportasyon.
Ayon sa senador, ilan lamang ito sa mga maaring gayahin na hakbang upang matugunan ang pasanin ng mga Pilipino sa kinakaharap na krisis sa langis ng bansa.
Sa huli, iisa parin ang panawagan sa senado, ang pangangailangan ng komprehensibong plano at agarang aksyon mula sa gobyerno.