Ikinababahala ni Caloocan Rep. Edgar Erice ang pagbagsak ng ekonomiya ng Pilipinas dahil sa ingay ng pulitika at kaliwa’t-kanang isyu ng korapsyon.
Tinukoy ng mambabatas ang hindi pagkaka-abot ng Pilipinas sa target nitong gross domestic product (GDP) noong 2025 na dapat sana ay 5.7%.
Sa halip, umabot lamang aniya sa 4.5% ang nakuha ng bansa, o mahigit isang porsyentong (1%) mas mababa.
Posible rin aniyang mas mababa pa rito ang maaabot na GDP ngayong unang quarter ng 2026 dahil hindi rin bumubuti ang sitwasyon sa bansa.
Inihalimbawa ng mambabatas ang epekto ng flood control scandal sa sektor ng paggawa, construction, at mga kaugnay na industriya, na aniya’y unti-unting nakakaramdam ng direktang epekto ng korapsyon, kasama na ang pagtigil sa mga large scale infrastructure project habang nagpapatuloy ang imbestigasyon.
Sa usapin ng pulitika, unti-unti na rin aniyang nararamdaman ng pamahalaan ang pagkawala ng tiwala ng mga mamumuhunan, dahil sa tuloy-tuloy na away pulitika, lalo na sa pagitan ng administrasyong Marcos at ng kampo ni Vice President Sara Duterte.
---
Nilinaw ni Philippine Coast Guard spokesperson for the West Philippine Sea (WPS) Commodore Jay Tarriela na walang direktiba sa kaniya para mag-tone down at minimize o bawasan ang kaniyang media exposure.
Ito ang kasagutan ng PCG official ngayong Biyernes, Pebrero 20, nang matanong kung nagdulot ng hamon sa kaniyang mandato ang pressure mula sa Chinese Embassy, matapos nitong himukin ang gobyerno ng Pilipinas na hayaan ang Department of Foreign Affairs na manguna sa pangangasiwa sa mga salungatan.
Ayon kay Comm. Tarriela, buo ang suporta ng Palasyo Malacañang sa transparency initiative sa mga usapin sa West Philippine Sea.
Samantala, inihayag din ni Comm. Tarriela na tumataas ang Foreign Information Manipulation and Interference (FIMI) operations ng China sa ating bansa sa mga nakalipas na taon.
Paliwanag ni Comm. Tarriela ito ay dahil kailangan ng panig ng China na magsumikap na malabanan ang transparency effort ng bansa.
Gayunman, naniniwala si Comm. Tarriela na sa ilalim ng kasalukuyang administrasyon, kung saan batid aniya ng lahat kung ano ang nangyayari, mahirap para sa Chinese government na baluktutin ang opinion ng publiko pagdating sa West Philippine Sea sa kasalukuyan.